Pitkos en nog meer...

---

Wanneer die Kersliggies die strate verhelder, wil ek beleef hoe U Lig hierdie donker wereld verlig.

Terwyl  ek my Kersboom versier, wil ek onthou hoeveel pakkies genade

U elke dag onder die boom van my hart sit.

En wanneer ons geskenke uitruil, wil ek die grootste Geskenk van alle tye weer in my lewe innooi.

Ek wil van jaar met oorgawe uitjubel: Ere aan my God wat in die hoogste Hemel regeer,

en vrede... vrede aan almal hier op die aarde

So hou ons verlede Saterdag 'n wonderlike Kers-sangaand in Fauresmith. Man en muis is daar, met lekker koffie en koek na die tyd.'n Dogtertjie kom my toe. "Tannie het baie mooi gesing" , lewer sy kommentaar. Ek heg waarde aan kinders se mening,  en ek voel gevlei deur haar opmerking.

"Dankie! " antwoord ek. "Ek is so bly jy het ook gekom om te kom luister!"

Haar ogies kyk stip na my. "Nee, Tannie, dis nie hoekom ek gekom het nie. Ek is hier omdat ek BAIE van koeksisters hou."

Sonder skroom of doekies omdraai. Daar val my eie-trots woeps! op die grond. Fauresmith -eerlikheid is, net soos die omgewing, baie opreg ... wat jy sien is wat jy kry, en as jy dit nie kan vat nie, moenie bly nie!!!