Pitkos en nog meer...

---

In die pragtige NG Moederkerk van Laingsburg, is 'n merker, wat aandui hoe hoog die groot vloed in die tagtiger-jare, deur die kerk gestroom het. Hoog, man, dieper as 'n swembad se diepkant - ver bokant Francois se kop. Maar as jy vandag in die kerk kom, sal jy dit nooit eers weet nie. Alles wat herstel moes word, is lankal gedoen. Maar dit was blykbaar nie veel nie - 'n paar kerkbanke, en die onderste gedeelte van die imposante soliede hout kansel. En bokant die kansel staan hierdie wonderlike woorde teen die muur geverf in sulke swaar, duidelike letters: "HET EVANGELIE DER GENADE GODS"

En ons dink: God se Woord laat hom nie deur waters wegdryf nie, nie deur bomme, seisoene, mense wat kom en gaan, of selfs ook nie deur die gebrekkige manier waarop ons mense die Woord probeer oordra, en soms so ver tekort skiet nie. Hoe wonderlik is dit: dat daar vir ons almal nog genade tyd oorgebly het; en ook dat die behoud van die kerk - letterlik en figuurlik - gelukkig nie deur mense bepaal word nie maar deur HET EVANGELIE DER GENADE GODS!  

Here Jesus, waar is die vrede waarvan die engele gesing het?

Toe ek ‘n kind was, het ek hier teen die einde van die jaar gebewe

van ekstase oor engele en geskenke.

Nou is alles leeg en dood.

Persente is tydelik, die engele sing nie

en oor U en U alleen bewe ek nie

Here, by U kom vra ek met skaamte ‘n lewensveranderende ingryping

By U vra ek ‘n rivier in vloed:

Ek vra ‘n vloed van dankbaarheid,

‘n vloed van sekerheid

‘n vloed van vrede in my gemoed

Uit: HY VERKWIK MY SIEL; STRUIK CHRISTELIKE BOEKE

LEEF NOU

mens kan nie vir altyd sterf nie:

op ‘n dag moet jy jou dagboeke verbrand

én die brûe van die verlede

as jy tot die besef kom dat hulle nie na die toekoms toe lei nie ...

op ‘n dag moet jy vergete ou kennisse

en vasgegroeide ge-ykte gewoontes uit jou lewe verban

hulle houvas afkap - vingers en al

op ‘n dag  moet jy teen jou eie pas begin loop,

jouself van ander se mening stroop

alleen gaan fietsry

sonder `n trui omdat die res koudkry

gaan waar jy wil, in stilte –

en in die geheim speel jy’s weer sewe

een goeie dag, moet jy opstaan 

-  en lewe