Pitkos en nog meer...

---

STAAN OP STAAN OP VIR JESUS

As kind, toe die Hallelujaboekie nog vrylik in gebruik was, het almal lied 444: “Staan op, staan op vir Jesus”goed geken en graag gesing. Maar wie weet hoe die lied ontstaan het? Dis ‘n heel merkwaardige storie.

Dudley Tyng was ‘n jong predikant in Philadelphia in die VSA. Sy passie in die lewe was veral om getroude mans en vaders na Jesus toe te lei. Op ‘n dag in 1858 het hy ‘n reuseveldtog waar 5,000 mans teenwoordig was, toegespreek (amper soos vandag se Mighty Men-saamtrekke!). Terwyl hy oor die massa heen gestaar het, het hy in ‘n oomblik van oortuiging gesê: “Ek sal eerder dat my arm reg in die potjie geamputeer word as om nie vandag my plig te doen en aan julle die boodskap van God te verkondig nie.” Volgens getuies het meer as ‘n duisend mans daardie dag hulle lewens aan die Here toegewy.

Twee weke later het sy mou in ‘n dorsmasjien vasgehaak en is sy arm in die potjie afgeruk. Toe dit duidelik was dat sy lewe op aarde verby is, het hy aan sy gryse ou vader, self ‘n predikant gesê: “Pa, sê vir die mense dat hulle vir Jesus moet opstaan.”

‘n Ander predikant, ene George Duffield was so aangeraak deur dié sterwenswoorde dat hy ‘n gedig geskryf het na aanleiding van Efesiërs 6 wat later die bekende “Staan op, staan op vir Jesus, o helde van die kruis” geword het. Iemand het dit getoonset en so het die woorde letterlik miljoene mense oor die hele wêreld geïnspireer.

Ons sing die lied vanweë verskeie redes nie meer nie maar tog bly dit ons inspireer om op te staan vir dit waarin ons glo. Ons durf nie stilbly wanneer God ‘n helder en sterk woord van ons vereis nie.

....Wanneer laas , Here, het ek vir U opgestaan – openlik en sonder skroom. Gee my die oortuiging om te staan wanneer dit tel.

wie is hierdie Jesus, wat stormwinde stilmaak

wie is Hy wat siekes en kreupeles kom aanraak

wie is hierdie Jesus, dat mense Hom wil kruis

wie is Hy , dat engele Hom prys?

Hy is die Groter Liefde, die lewensbrood, die wyn

die Waarheid en die Wysheid die Morester wat skyn

Hy kom weer op die wolke en elke knie sal buig

die wat Hom gevolg het sal ewig jubel en juig!

wie is U o Jesus, wat op die aandwind fluister ..

wie is U o Jesus , wat lig bring in my duister

wie is U o Jesus, wat sterf in soveel smart

wie is U wat leef hier in my hart?

U is die Groter Liefde, my lewensbrood, my wyn

my Warrheid en my Wysheid, my Morester wat skyn

U kom weer op die wolke en elke knie sal buig

Die wat U gevolg het, sal ewig jubel en juig!

HIERDIE JESUS - E Fourie