Francois en Elizabeth dans nog ‘n keer

Met Wil jy dans Carina het Francois en Elizabeth 25 jaar gelede die Afrikaanse musiek-vloer ingedans en oornag bekendheid verwerf. Dié twee het hulle sedertdien gevestig as ‘n immer-gewilde duetpaar wat met sprankelende verhoogpersoonlikheid en tydlose musiek, steeds in aanvraag is.

Francois en Elizabeth reik met trots hulle nuutste album, HEMELDANS , uit. Die album bestaan uit 2 cd’s:  ‘n kombinasie van ligte- en geestelik-inspirerende musiek, tipies in die styl waarvoor Francois en Elizabeth so geliefd is. Die album word ingelei met Ek hoop jy dans - ‘n splinternuwe Elizabeth komposisie. “Alhoewel hierdie liedjie ‘n lekker aansteeklike ritme het wat jou beslis uit jou stoel sal kry, het ons ‘n dieper betekenis in gedagte. Hierdie lied is eintlik ‘n bly-wees-dans oor die dinge wat die lewe vir ons die moeite werd maak. Om die waarheid te sê: die hele album gaan oor lewensvreugde ... en in daardie sin, is Ek hoop jy dans ‘n perfekte tema”.

Op cd 1, bring Francois en Elizabeth, ‘n paar immer-gewilde snitte soos Hou van jou en Carina, wat op spesiale versoek weer ingesluit is,  en verder ‘n groot variasie van musiek met ‘n gemaklike  saam-sing-klank. Daar is twee heerlike Duitse keurspele, ‘n lekker “golden-oldies medley”, ‘n country-liedjie Song vir Cindy, en liedjies soos Dolfyne en Drome van gister. Francois wys selfs sy klassieke slag met ‘n pragtige Italiaanse keurspel van Santa Lucia en O sole mio.

 Op cd 2,  ‘n  lekker-luister  gevoels-album, inspireer Francois en Elizabeth met liedere soos Prys die Lam , Kosbaar, Oorwinningslied, God be with you, Always and forever , en die gevoelvolle voorlesing: Die hemel het ‘n nommer.

Elizabeth het  meeste van die musiek vir die album self geskryf, en daarom het dit ‘n oorspronklike  klank en inhoud wat iets van hulle mens-wees uitbeeld.  “Na soveel jare weet ons presies wat ons mense graag sal wil hê en ons glo HEMELDANS gaan baie goed aan hulle behoefte voldoen:  kwaliteit- musiek wat die toets van tyd deurstaan het.”  Francois en Elizabeth toer in September Kaaptoe en gaan HEMELDANS op Sutherland bekendstel.  “Dit klink vir ons so reg om hierdie musiek onder die sterre te sing! “

Vir volledige inligting oor optredes, posbestellings en besprekings, besoek www.francois-en-elizabeth.co.za

of kontak Lydia Winchester by 0825548453.