Snitte op die CD :

Dansliedjie
Wielie Walie Medley
Gym Liedjie
Spokie Karnaval
Die Lekkergoedliedjie
Die Muis
The Rockstar Twinkle Song
Reënboogkleure
Mangwane Mpulele
Plaasdiere Liedjie
Pienk Olifant
Hasie
Sannie se Lammetjie
Wippie en Snippie
Kiepie Kiepie
My Hartjie My Liefie
Paddatjie
Die Koeitjie
Die Seilboot
Die Koekoek Klokkie

MEDIA VRYSTELLING

Datum: Junie 2013

Uitgereik deur: EF Musiek

Vir meer inligting, kontak Lydia Winchester:

Tel: 011 475 2187; Sel: 082 554 8453; E-pos: lydiaw@mweb.co.za

ELIZABETH FOURIE – SAAMSING LIEDJIES

2013 is ‘n super-spesiale jaar vir Elizabeth Fourie. Nie net het sy pas ouma geword nie, maar sy het ook twintig liedjies (waarvan talle haar eie) opgeneem op die bruisende nuwe album, Saamsing Liedjies. En om alles te kroon, word sy later vanjaar deur die Vereniging van Voorskoolse Onderwys en Sorg (VVOS) vereer vir haar bydrae tot kindermusiek.

Elizabeth en Francois Fourie se dogter, Minnette, het onlangs aan hul eerste kleinkind, Johan Chris Heunis die lewe geskenk. “Ek het by Minnette gaan bly om bietjie te help aan die begin. Tot my verbasing het Johan sy ogies oopgemaak en sy koppie na my gedraai, die oomblik toe ek vir hom begin sing het. Ek het al gewonder of ek my expiry date met die kinderliedjies bereik het, maar toe ek sy reaksie sien, het ek besef: ek het nog BAIE werk!”

Saamsing Liedjies is – soos die titel aandui – gemik op van babatjies tot kinders van so tussen vyf en elf jaar oud wat luidkeels kan saamsing. Die vrolike verskeidenheid sluit in bekende én tradisionele liedjies asook ‘n hele paar nuwe komposisies deur Elizabeth. Altesame sewe van haar kinderliedjies is immers onlangs in die nuwe FAK Sangbundel opgeneem. “Dit bewys dat my kinderliedjies volksbesit geword het en dit is vir my ‘n besonderse nalatenskap om te kan hê.”

Van die nuwe liedjies deur Elizabeth, wat op Saamsing Liedjies ingesluit is, is Die Lekkergoedliedjie, Spokie Karnaval, Die Koekoek Klokkie en Gym Liedjie. Dan het sy ook bekende liedjies in klein medleys verwerk, elke keer rondom ‘n spesifieke tema. Soos Paddatjie, waar al die liedjies oor paddas handel. Daar is ook twee verwerkings in Engels en Sotho onderskeidelik. “ ‘n Skooljuffrou het vir my die woorde van O die liewe Marthatjie in Sotho gestuur, asook My hartjie my liefie. Té kostelik.” Dit is dan as Mangwane Mpulele ingesluit en die Engelse liedjie is The Rockstar Twinkle Song.

Francois, die ander helfte van die gewilde sangpaar wat al dertig jaar lank gehore landwyd vermaak, sing hier en daar saam, behartig van die agtergrondsang en “geluide”. “Die kinderliedjies was altyd maar my afdeling, maar daar is soveel kindertjies wat deesdae sonder pappa grootword, dat ek dink dis goed om hulle deur middel van musiek ‘n balans te gee wat dit aanbetref.”

Volgens Elizabeth is dit belangrik dat kinders met die liedjies kan assosieer. “Hulle moet dit maklik en vinnig kan leer. En die inhoud van die woorde moet uit hul leefwêreld kom. ‘n Kind van drie kan nog nie ‘n liefdeslied waardeer nie. Ek verpes dit as kinders ryp gedruk word met grootmens-musiek.”

Dit is voorwaar ‘n “kinderjaar”, want Elizabeth beplan reeds daardie “lang verwagte” kinder-DVD en Jesus Liedjies 2 volg ook later vanjaar. Intussen kan kind en kraai, ma, pa, oupa, ouma en selfs juffrou saamsing met die tintelende treffer-album, Saamsing Liedjies.

Ons eerste kleinkind, Johan Chris Heunis, is die afgelope week gebore. Hy en sy mamma is gesond, was 3.5 kg met geboorte, en is die langste babatjie wat vir die dag gebore is.(… Alreeds ‘n wenner! )
Hy is die heel mooiste baba in die hele wêreld… dis vanselfsprekend!
Hy regeer al klaar ons kalender, met dié dat hy 10 dae te vroeg al opgedaag , en ons hele Mei-maand beplanning omver kom gooi het!! Maar, dit maak nie saak nie. Ons vreugde oor die nuwe fase van ons lewe, ken geen perke nie. Binnekort verskyn “ SAAMSING LIEDJIES”; ‘n splinternuwe kinder album, wat natuurlik aan die nuwe “celebrity” opgedra is!