Vir 'n jaar of twee maak jy bymekaar: nuwe liedjies kry vorm in jou hart; flenter-papiertjies met woorde en idees, warrel in die huis en in jou kop rond. En dan op 'n dag, weet jy: die tyd is reg! So saam met hierdie mooi lenteseisoen het dit met ons gebeur. Ons weet ons het die regte materiaal vir 'n nuwe album. 'n Geestelike een, ... inspirerende musiek vir 'n voos en moedelose wereld. So, hou hierdie spasie dop! Ons gaan voluit vorentoe met liedjies soos "My blydskap en kroon" , "Skyn oor my" , " Ek wil die HERE loof" en "Laat die Fees begin". Elkeen 'n juweel in eie reg.  

Inderdaad: LAAT DIE FEES BEGIN!  

Vrydag oggend elf-uur is dit kuier-tyd by die seniors van Secunda met 'n lekker ete en musiek, aangebied by N G Secunda Oos Gemeente; Vrydag aand is dit brood, biltong, musiek en kuier saam met die AP Kerk van Witbank in die Civic; en Sondag oggend om half-nege loof ons die HERE saam met Westergloed Gemeente in Nelspruit. Daar's altyd plek vir nog mense ... ons sal planmaak - kom net!!! Ons onthou hoe hulle een aand, agter die gordyne, waar ons gesit en wag het vir die konsert om te begin, ewe verlee kom vra het vir die twee stoele waarop ons sit omdat daar nog mense opgedaag het.... LEKKER! Kom vat maar ons stoele!!

Sondag oggend 11 September vier ons fees saam met N G Gemeente Waterval in Newlands, vir 90 jaar se genade. Kom sing en loof die HERE saam met ons! Dit begin 08h45 en almal is welkom! 

En Sondag aand 11 September vier ons die koms van die nuwe seisoen met 'n Lente Lofsangaand in Parys Wes gemeente om 18h00. Bring jou hart en jou dankbaarheid ... en laat ons sing!